എസ്തപ്പാൻ

 

 

 

 

 

 

 

 

 

 

 

എസ്തപ്പാൻ ബീവരേജസിന്റെ
വരിയുടെ പുറകിൽ നിന്നും ഒരു കാച്ച്
സോമൻ സാറേ , പൂട്ടല്ലേ...

എന്നിട്ടൊരു ചിരിയും
ഊരക്കൊരു താങ്ങും കൊടുത്ത്
സ്റ്റൈലായി ഒരു നിപ്പ്...
...
വരീന്നോരുതൻ മിണ്ടാതിരിയെടാ മൈ-----
മറ്റൊരുത്തന്റെ ആത്മഗതം
ഇവിടെ നമുക്ക് തന്നെ കിട്ടുമോ
ആവോ അപ്പഴാ അവന്റെ സാറ്
സാറല്ല ------- ഹും....

ഇതൊന്നും അറിയാതെ സോമൻ സാർ
ബില്ലിംഗ് മെഷീൻ ബില്ലുകൾ
തുപ്പി കൊണ്ടേ ഇരുന്നു...
ബി പി എല് മുതൽ, എ പി എല് വരെ...

ഗാന്ധി അപ്പോഴും നിസ്സഹായനായി
ഒഴുകി കൊണ്ടേയിരിക്കുന്നു.....

അപ്പുറത്തെ പാൻ മസാലക്കാരൻ
ചാർ സൌ ബീസ് തകൃതിയായി
ഒരുക്കുന്നു....

ഇപ്പുറത്തെ തട്ടുകടയിൽ
പുഴുങ്ങിയ മുട്ടകൾ , സമൂസകൾ
തീരുന്നതിനു മുന്നേ വന്നു നിറയുന്നു...

വരിയിൽ പതിവുകാരുണ്ട്
സങ്കടം തീര്ക്കാൻ വന്നവർ
സന്തോഷം മൂപ്പിക്കാൻ വന്നവർ
അങ്ങനെ പലരുണ്ട്

രണ്ടെണ്ണം അടിക്കാൻ എല്ലാവര്ക്കുമുണ്ട്
ഓരോ കാരണങ്ങൾ .....

വരി മുന്നോട്ടു നീങ്ങി
എസ്തപ്പാൻ തന്റെ പതിവ് തേനീച്ച
ആദരവോടെ ഏറ്റു വാങ്ങി
അരയിൽ തിരുകി ഇരുട്ടിലേക്ക്
ആരോ ചാര്ജ് ചെയ്തപോലെ....

അപ്പോൾ എന്തായിരിക്കും
അയാളുടെ മനസ്സില്....

ആ... ആര്ക്കറിയാം
രണ്ടെണ്ണം അടിക്കാൻ എല്ലാവര്ക്കുമുണ്ട്
ഓരോ കാരണങ്ങൾ .....

ദീപു മാധവന് - 03-04-2013