ഇടവേള - 5 മാസം 6 ദിവസം

എവിടെ വച്ചാണ് എന്റെ-

വാക്കുകൾക്കു മുറിവേറ്റത് ?

എവിടെയാണ് എനിക്കു തിരശീലക്കു പിന്നിൽ

മറയേണ്ടിവന്നത് ?

എന്തു മോന്തിയാണിന്നുവരെ-

യെന്റെ തൂലികയുടെ കാഴ്ച

നഷ്ടപ്പെട്ടത് ?

തിളക്കുന്ന നെഞ്ചിലെ

ലാവ തന്നെയായിരുന്നു പലതും

ഇനിയേതു കണ്ണിന്റെ

ഇനിയേതു കിണറിന്റെ

ഇനിയേതു ചങ്കിന്റെ ,

ആ‍ഴങ്ങളിലാണു ഞാൻ-

എന്നെ തിരയേണ്ടത് ?

എല്ലാം വറ്റി വരണ്ടു -

കിടക്കുകയാണ്...

ഒരു മഴ കാത്തു കിടക്കുകയാണ്

ഞാനും...!

മരങ്ങൾക്കിടയിൽ നിന്നും

നിങളെന്നെത്തന്നെ നോക്കിക്കൊണ്ടിരിക്കണം.

മിന്നൽ പോലൊന്നു നമ്മെ -

വന്നു പുണരും..

ചിലതു കരിഞ്ഞുണങ്ങും

ചിലതു തളിർക്കും 'കൂണു' പോലെ

കാത്തിരിക്കുന്നു...

5 മാസത്തെ ഇടവേളക്കു ശേഷം 21.11.08 ദീപു മേലാറ്റൂർ