Wednesday, January 6, 2016

ആകസ്മികം


*******************
കലാലയത്തെ പിരിഞ്ഞതിന്റെ
പിറ്റേ ആണ്ടിൽ 
യുവജനോത്സവത്തിന്റെ
അന്നാണ് വീണ്ടും
ഞങ്ങൾ ബഹളങ്ങൾ
എല്ലാവരും ഒന്നിച്ചത്
പഴയ നിശ്വാസങ്ങളെ
ശാസനകളെ ...
തൊട്ടും തലോടിയും
പുതിയ തലമുറകളെ
ആഘോഷങ്ങളെ
അസൂയയോടെ നോക്കിക്കണ്ടും
തിരിച്ചിറങ്ങുമ്പോൾ
പുറത്തേക്കുള്ള വഴിയിൽ
അവിടെയാകെ തിരഞ്ഞിട്ടും
കാണാതെ പോയല്ലോ എന്നോർത്ത
വലിയ കണ്ണുകളുള്ള
അവസാന വര്ഷ ബിരുദക്കാരി
വിട വാങ്ങലിന്റെ വേദന
തലമുറകൾ കൈമാറി
അവളിലെത്തി നില്ക്കുകയാണ്
ഇരമ്പി വന്ന ഓർമകളെ
ഒരു പുഞ്ചിരിയിലൊതുക്കി
വിറയാർന്ന കൈകളാൽ
നീട്ടിയ ഓട്ടോഗ്രാഫിൽ
നോക്കി അക്ഷരം മറന്നു നിന്നു
അരുതെന്നാഗ്രഹിച്ചിട്ടും
ആ വിറയാർന്ന കൈവെള്ളയിൽ
എന്തോ കോറിയിട്ട്
തിരിഞ്ഞു നോക്കാതെ നടന്നു
പിന്നെടെപ്പോഴോ ഒരിക്കൽ
പറഞ്ഞിരുന്നു അതെന്റെ
വിരലുകളായിരുന്നില്ല പെണ്ണെ
എനിക്കറിയാമായിരുന്നു എന്ന് മറുപടി
വർഷങ്ങൾ കടന്നു പോയിരിക്കുന്നു
ഒരു വിവാഹ ആല്ബത്തിലേക്ക്
ചേക്കേറിയ ആ കൈവെള്ള
ഇപ്പോഴോർക്കേണ്ടി വന്നത്
അന്നല്ലെന്നു പറഞ്ഞ
അതെ വിരലുകളാൽ എന്നത്
ആകസ്മികം മാത്രം.....!!!
ദീപു മാധവൻ - 05-01-2016

Monday, January 4, 2016

മിസ്റ്റീരിയസ്


**************

ഉള്ളത്
ഓർത്തെടുക്കാൻ;
അങ്ങിനെ അളന്നെടുക്കാൻ
അധികമൊന്നുമില്ലാത്ത
ശരാശരി പോലെ
തോന്നിപ്പിക്കാവുന്ന
ഒരു സെമി മിസ്റ്റീരിയസ്
ഉപബോധവും  
ഭൂതകാലവും മാത്രം  

അവയാണ്
ചിതലരിച്ചതായും
ഇരുട്ട് മൂടിയതായും
ഭാരമില്ലാതെയുയർന്ന്
കൊക്കയിലേക്ക് പതിച്ചതായും
പിന്നെ ഇല്ലാതെയായതായും
തുടങ്ങി......

ഏകാന്തതയുടെ
തണുപ്പുള്ള കുളംബടികളുടെ  
അകമ്പടിയോടെ സ്വപ്നങ്ങളിലേറി  
എവിടെയൊക്കെയോ നിന്ന്
കോടമഞ്ഞ്‌ പോലെയെന്നിലേക്ക്
ഊളിയിട്ടിറങ്ങുന്നത്‌...

ഉറക്കത്തിനിടെ മാത്രം വരുന്ന
അതിഥിയെയെത്ര
ഞെട്ടിതിരഞ്ഞു നോക്കിയിട്ടും
ഓർത്തെടുക്കാൻ കഴിയുന്നേയില്ല
ഇല്ല മുന്പെങ്ങും കണ്ടിട്ടേയില്ല...

ഇല്ല പണ്ടെങ്ങും പൈൻ
മരങ്ങള്ക്കിടയിലൂടെ
കുതിര സവാരിക്ക് പോയതായി
ഞാൻ ഓർക്കുന്നേയില്ല...

പക്ഷെ ഈ  കോച്ചുന്ന തണുപ്പിന്റെ
രൂക്ഷ ഗന്ധം
ഓർത്തെടുക്കാൻ പറ്റാത്ത
എവിടെയൊക്കെയോ എന്നെയും
കൊണ്ട് കുതിച്ചു പാഞ്ഞു കൊണ്ടേയിരുന്നു....!!!

- ദീപു മാധവൻ - 04-01-2016